Penitensya

Mabigat na krus bitbit ng mamang lasing sa bilog at ram na pinagsaluhan

Ng mga kasamang may panata sa Mahal na Araw

Gegewang-gewang ang mabigat na krus, nananahi ng sinulid sa kalsadang

Tila mabibiyak sa init ng araw na nakatunganga sa kalawakan.


Batang may bitbit na tabo na may lamang tubig poso

Na may halong dugo: hugasan para sa bleyd

Na gamit pangguhit nang mababaw o malalim sa balat ng mga mamang

Pumaparada sa kalye kasama ang buong barkada para sa panata.


Sa tapat ng bawat istasyong itinayo ng bawat baranggay ng bayan

Hihinto ang mga mamang nabanggit sa harapan ng Mahal na Ina

O Mahal na Anak na nakapako sa Krus; magdarasal

Hihingi ng tawad o nakatihaya o nakataob lang, humihinga, alin ba?


Sa simbahan ang tuloy pagkatapos ng mahabang lakad

Hihiga nang nakataob sa batong lapag at mahuhulog ang ilang dahon ng bogembilya
Mula sa kanilang mga koronang yari sa nasabing matinik na halaman

Ilang patak ng dugo at pawis ang makikilahok sa naipong mga alikabok sa sahig.


Ang mamang lasing pagkatapos ng mahabang pagkakahimlay sa malamig na sahig na marmol

Lalabas ng simbahan, sisinagan ng nanggagalaiting araw

Pagod, gutom, pawisan, nagdurugo. Ang sugat mahapdi.

Masakit ang ulo o hang-ober? Panata o “panata lang”? Pare, inuman ulit!